5 أخطاء غامضة يرتكبها كل كاتب مبتدئ - تعلم كيف تتجنبها

أكيد في مرة قريت اللي كتبته وحسيت إن فيه حاجة ناقصة. مش بسبب غلطة إملائية ولا تنسيق مش مناسب، لكن إحساس إنك فقدت صوتك ككاتب. الإحساس ده هو اللي بيوريك إنك وقعت في 5 أخطاء شائعة بيعملها الكتاب المبتدئون - وأنا كنت واحدة منهم - من غير ما ياخدوا بالهم.

في المقال ده، هنكتشف الـ 5 أخطاء بالتفصيل وهنقول لك على حلول عملية عشان تعرف تتفاداها، وتلاقي بصمتك الفريدة وتوقف أخطاء الكتابة للمبتدئين.

خلونا نبدأ ونشوف إيه هي الأخطاء دي…

 أخطاء الكتاب المبتدئين

1- ✖️ تكتب للجميع = تكتب للَّا حد.

فاكر إعلانات المصرية التقليدية؟ الصوت الرجولي اللي بيقول: "الحق دلوقتي اشترِ واحد وخد التاني هديه" ؟ بتحسها جملة مصنّعة ومش بتشدك، مش كده؟
السبب إن الإعلان كان موجه لأي شخص فاتح القناة على التلفزيون وبيتفرج، أما الإعلانات الناجحة  حالياً فبتحكي قصة وتستهدف مجموعة محددة بوضوح من خلال القصة دي.

فى بداية مشواري وقعت في الغلطة ، لإني كنت فاكرة إن الأسلوب الشامل يعجب ناس أكتر، فبقيت أكتب للجميع. ولما بتكتب للجميع، عمرك ما هتوصل حد.

قبل ما تبدأ تكتب، اسأل نفسك سؤال واحد واضح: أنا بكتب لمين؟
مش بس: راجل ولا ست؟ وكم عمرهم؟ و عايشين فين؟ لا -  اسال كمان عن:

• أسلوب حياتهم
  
  

• نقاط ضعفهم وقوتهم
  
  

• إيه اللي بيحبوه وبيتفاعلوا معاه
  
  

• اهتماماتهم اليومية.
  
  

لما تحدد الشخصية دي بدقة، رسالتك وأساليبك هتتغير لوحدها.
✖️ الخطأ: تحاول تكتب محتوى يرضي الكل.
✔️ النصيحة: قبل ما تكتب حرف واحد، اختار أنت بتكتب لمين.

وده بياخدنا للخطأ الثاني... 

2. ✖️ تقليد أسلوب الآخرين بدل بناء أسلوبك الخاص.

التغذية البصرية مهمة جدًا لأي كاتب. طبيعي تقرأ لكتّاب تانيين وتتعلم منهم، خصوصًا لو كتاباتهم ناجحة.

لكن هنا الفخ: مع الوقت، تلاقي نفسك بتقلد أسلوبهم بدون ما تحس، فاكر إن اسلوبهم هو الأمثل للوصول لجمهور اكبر وبالشكل ده هتوصل لنفس النجاح.

بس الصدمة؟ اللي بيقلد، دايمًا بيرجع خطوة لورا.

دلوقتي ومع زحمة المحتوى والكتاب، بقى صعب تلمح الفرق بين الأسلوب الحقيقي والمحتوى المكرر، وده حتى بعد ظهور الذكاء الاصطناعي. أقرأ هل يستبدل الذكاء الاصطناعي الكاتب؟ بين السرعة والابداع في زمن المحتوى الآلي

لسه المحتوى اللي المشهور هو اللي ليه "بصمة" و"اسلوب خاص". وعشان تلاقي بصمتك ككاتب، اسأل نفسك:

• إيه هو أسلوبي وطريقتي فى الكلام؟

هل هو ساخر ومضحك، علمي، أدبي، تحليلي وتفصيلي، مباشر، قصصي، تحفيزي، جدلي

• إزاي أكتب بنفس طريقة كلامي وشخصيتي؟
  
  

• أقدر أختار زاوية جديدة لموضوع اتكتب عنه ألف مرة؟
  
  

• ازاي اقدم معلومة بطريقتي؟
  
  

• تيجي نجرب تنسيق أو شكل كتابة مختلف؟
  
  

مش هتعرف أسلوبك من أول مرة، لكن مع كل بتكتب فيها، هتلاقي صوتك بيظهر تدريجيًا.
زي ما قال الكاتب ستيفن كينغ:

"اكتب ما تحب. إن كتبت لنفسك، ستجد صوتك الحقيقي."

 

3. ✖️ الخوف من النشر: العدو الأول لأي كاتب مبتدئ

 من 3 سنين كتبت بوست طويل بمناسبة "اليوم العالمي للصحة النفسية". كان موضوعه حساس: "ليه بيخاف مريض الاكتئاب يطلب المساعدة"؟
كتبت الكلام من غير ما أفكر، وكأنه بيخرج لوحده من قلبي قبل ايدي.
وبعد ما خلصت ورتبت الكلام علشان يبقى مقروء ومفهوم… حصل شيء غريب.
وقفت عند زر "نشر" ومقدرتش أضغط.

وبدأت الأسئلة تملى دماغي :

• هو أنا ليه كتبت الكلام ده؟

• مين مهتم وهيسمعني؟

• هل أنا وضحت فكرتي بعمق؟ ولا ده مجرد منشور عادي؟

• الأفضل أسيب الكلام في المسودة… ومحدش يقراه غيري؟

لو المواقف دي بتحصل لك، مبروك… إنت مش لوحدك.
ده خوف طبيعي عند أي كاتب في البداية، خصوصًا لو لسه بيدوّر على صوته الحقيقي. لكن لازم تعرف:

✅ صوتك مهم.
✅ من حقك تتكلم وتشارك فكرك، زي أي حد.
✅ النشر هو الخطوة الأهم في تطورك ككاتب.

جرّب:

• راجع محتواك وخليه بسيط وسهل للقارئ.

• افتكر إنك مش محتاج الكمال… لأن الكمال مش موجود.

• أضغط نشر، حتى لو في خوف. النشر نفسه جزء من العلاج.
  
  

ومع الوقت؟
اللي كتبته زمان، هيبقى دليل على تطورك.
والأفكار اللي كنت خايف تشاركها، هتبقى رسائل مهمة لناس غيرك يمكن محتاجين يقروها.

📝 خليك فاكر: "التطور = كتابة + نشر + أخطاء + تجربة."

بس قبل ماتكتب و ماتوصل لنقطة النهاية لازم ترجع للبداية، ودي يوصلنا للخطأ الرابع

 

4. ✖️ نسيان الهدف من الكتابة

قبل ما تكتب أي نص، أسال نفسك:

"ليه بتكتب؟ وعايز القارئ بعد ما ينهى قراءة آخر جملة قبل آخر نقطة يحس بإيه ؟"

الكتابة من غير هدف واضح = محتوى ضايع وسط الزحمة.

سواء بتكتب: بوست على السوشيال ميديا، مقال لمدونة ، قصة أو كتاب، فكر ما هو هدفك قبل البداية:

• هل عايز توصل معلومة؟
  
  

• تقنع بشيء؟
  
  

• ولا تبيع منتج؟
  
  

نصائح عملية:

• ✅حدد هدفك بوضوح قبل ما تكتب.
  
  

• ✅اربط بين هدفك واحتياجات جمهورك.
  
  

• ✅راجع كل فقرة: هل بتخدم الهدف ولا لأ؟
  
  

 احذر الكتابة بلا خطة… ولما تحس بالتوهان، ارجع دايمًا لسبب كتابتك، لإن الكتابة الهادفة هي اللي بتوصل.

 

5. ✖️ انتظار الإلهام

👈 نجيب محفوظ قالها ببساطة:

"أكتب لأن الكتابة ضرورة، لا لأنك تنتظر تصفيقًا من أحد."

في بداية مشواري، كنت اكتب لإرضاء الكل… والنتيجة؟ لم يهتم أحد. 

أهم درس تعلمته: الكتابة لازم تكون لنفسي قبل أي حد تاني. صحيح مهم تهتم بالجمهور وتقدّر تأثيرك عليه، بس الأهم إنك تكون بتحب اللي بتكتبه ومقتنع بيه. 

الكلام اللي بتكتبه بمشاعر وشغف بيوصل أسرع، ويخلق رابط حقيقي بينك وبين القارئ. لكن لو فضلت مستني "الإلهام" النابع من إعجاب الناس وتفاعلهم، هتفضل في دائرة الانتظار. ولما مفيش حد يقرأ، الحماس يقل، والكتابة تقف.

الحالة دي مختلفة عن قفلة الكاتب اللي بنسميها Writer's Block واللي بيعاني منها اغلب الكتاب … لو عايز تعرف عنا اكثر اقرأ مقال:  قفلة الكاتب Writer's Block: كيف تجاوزت جفاف الأفكار

القفلة ليها حلول، لكن انتظار الإلهام مرتبط برضانا عن رأي غيرنا مش عن ذاتنا.

فبدل ما تسأل: "الناس عايزين تقرأ إيه؟"

 اسأل نفسك: "أنا حابب اكتب عن ايه؟"

 وساعتها الإلهام هيجيلك من جواك، مش من حواليك.

🔍 نصيحة عملية: قبل ما تبدأ في أي كتابة أو فكرة، اكتب لنفسك فقرة قصيرة تجاوب فيها على سؤال: "أنا ليه عايز أكتب عن الموضوع ده؟"، ولو حسيت إن الإجابة جاية من شغف داخلي هتتفاجئ قد إيه الكلمات هتنساب بسهولة.

الخاتمة

كل كاتب مبدع كان في يوم من الأيام مبتدئ بيغلط. الفرق الوحيد إنّه اتعلم من غلطه وكمل.

ابدأ، اغلط، اتعلم... وكمّل كتابة. 

لو استفدت من المقال، شاركه مع أي حد لسه بيبدأ مشواره في الكتابة ✍️"

المصادر 

Writer’s Digest – “25 Common Writing Mistakes Writers Make (and How to Fix Them)”